KALIBO, Aklan—Paga-umpisahan eon it Department of Public Works and Highways (DPWH) ro Phase 2 it road rehabilitation sa isla it Boracay.

Raya ro ginkumpirma ni DPWH Sec. Mark Villar sa uman kara nga pagbisita ag ocular inspection sa patapos eon nga proyekto sa Phase I.

Kapin sa 300-Million pesos ro gintaeanang pondo para sa nasambitang proyekto nga maga-umpisa sa Elizalde Compound hasta sa Tambisaan Port.

Target it ahensya nga matapos ro Phase 2 sa dag-on 2020.

Ginpahayag dugang nga naging hangkat kanda ro pakikipaghinun-anon sa mga establisyementong apektado it road rehabilitation apang ko ulihi hay napasugot man nanda ro mga raya para sa mas madasig nandang trabaho sa isla.

Nauna eon kara nga may mga negosyanteng nag self-demolish it andang mga istraktura kat naga-umpisa pa eamang ro waea-tuo nga rehabilitasyon sa isla.

Madumdumang kapin sa 490 million pesos ro gintaeanang pondo it DPWH sa Phase I nga gingamit sa pagsaayos it karsada halin sa Cagban Port hasta sa Bolabog Boulevard.