ROXAS CITY – Hugot nga ginpanginwala sang media liason officer sang Jose Percival Estocada Jr. Command Platoon Igabon sang New People’s Army (NPA) ang alegasyon sang militar nga nagapatigayon sang extortion activites ang mga rebelde nga grupo pinaagi sa pagpadala sang sulat sa mga kandidato nga guston magpangampanya sa lugar nga kontrolado sang NPA.

Aminado si Ka Roja nga nagapatuman sila sang permit to campaign rules sa mga kandidato nga luyag magpangampanya sa mga lugar nga kontrolado sang mga rebelde, apang kinahanglan nga makig-angut ang mga kandidato sa mga lider sang NPA sa nasambit nga lugar antes magsulod.

Apang ginhatagan paathag sini nga bisan san-o wala nagapadala sang sulat nga nagapangilkil sa mga kandidato ang mga NPA.

Kinahanglan lamang nga sundon sang mga kandidato ang tatlo ka polisiya sang NPA kasubong na lamang sang pagdumili sa pagdala sang armas, bawal ang vote buying kag labi sa tanan ginadumilian ang pagpahog sa mga botante kag mga sibilyan para mangin matawhay sila nga makapangampanya.