KALIBO, Aklan–Paga-istudyuahan sigon it Boracay Inter- Agency Management Group (BIAMG) ro hinyo it Philippine Kiteboarding Association may kaangtanan sa andang pagpamaeabag nga mabutangan it dugang nga karsada ukon anumang development sa area it Bolabog Beach matapos ro Phase I it Boracay Rehab antes umpisahan ro road extension sa lugar.

Sa sangka interview kay Khristopher Ken Nacor, Vice President it Philippine Kiteborading Association, indi eon sigon kinahang-ean ro development sa lugar bangud sa mag-eowas nga maisot eamang ro kumunidad it Bolabog hay base mabag-o ro imahe kara bilang kitesurfing ag windsurfing destination.

Ginpahayag dugang nga kilaea makaron ro Bolabog Beach bilang top Kite Surfing destination sa Asya ag pang-lima sa Europa.

Ginrekomenda it asosasyon nga i-preserve eon lang ro lugar para sa mga watersports activity bangud nga uwa man dikara masami nagapaligos ro mga turista tuga it mabaskog nga hangin kada amihan.

Ginakabaeak-ean nga magiging delikado sa mga kite boarders ag wind surfers kon magabutang pa idto it bag-ong karsada halin sa Bolabog Boulevard paeapos sa Ati Village area.

Nasayuran nga nakipagpueong ro Kiteboarding Association ag iba pang watersports operators sa Boracay Inter- Agency Management Group para sa andang nasambitang apela.