ROXAS CITY- Padayon nga ginabulong sa ospital ang isa ka lalaki matapos  ginaalegar nalukpan sang Improvised Explosive Device ukon IED sa Sitio Malinong, Brgy Poblacion, Sapian, Capiz.

Pilason ang biktima nga si Eliseo Legarda sang nasambit nga lugar matapos nga nag-angkon sang mga kapilasan sa lawas partikular na sa batiis kag likod.

Suno sa gumangkon sang biktima nga si Alyas Joyjoy nga naguwa sa ila balay si Legarda para kuntani mangihi apang hinali na lamang may napanimahuan nga gasolina sang iya  nga motorsiklo rason nga gintsyekyar niya ini.

Apang, dimalas nga may naglupok sa area sa diin yara ang biktima.

Nakibot na lamang ang himata sang biktima sang nakabati sang mabaskog nga pagsigabong gikan sa guwa sang ila balay kag sa ila pagguwa, ila nakita nga pilason na si Legarda nga ginapatihan nalukpan sang granada.

Samtang, wala naman may narekober nga granada ang mga otoridad sa lugar sang pagsigabong.

Sa karon, padayon naman ang imbestigasyon sang mga kapulisan sa hitabo.