KALIBO, Aklan— Ginbulgar it Boracay Inter-agency Rehabilitation Management Group (BIARMG) nga haeos 50 percent it accommodation establishments hay nagapabilin nga naga-eabag sa coastal and road easements, ap-at nga buean matapos ro Boracay re-opening.

Suno kay BIARMG general manager Natividad Bernandino, maabo pa sigon ro mga establishments nga non-compliant ag naga-operate maskin nga uwa it permits ag accreditation.

Ginpahayag dugang nga mahinay ro compliance sa beach easements ag may mga pasaway gihapon nga mga business owners.

Agud masustain sigon ro ginhimo kato nga closure, may mga gintaeanang thematic areas sa enforcement of laws; rehabilitation; recovery and environmental protection.

Inde sigon pagpasugtan it gobyerno ro “reversal” it kadaeag-an sa Boracay closure.

Nauna eon kara nga gintaw-an it 15 diyas nga ultimatum it BIARMG ro mga identified establishments nga Steve’s Cliff/Boracay Terraces Resort; Willy’s Rock Resort; Boracay Plaza Resort; Little Prairie Inn; Watercolors Diveshop; Blue Lilly Hotel; Exclusive Dawn VIP Boracay Resort; True Home; ag New Wave Divers nga makit-an tanan sa Station 1 area ag ro Calveston International Inc. sa Station 2 bangud sa uwa pa ro mga raya gihapon naka-comply it mga nagakaigong dokumento agud makapag-operate it uman sa andang negosyo sa nasambitang isla.