ROXAS CITY – Nangin isyu karon sa pila ka mga  Capizeño ang temporaryo nga pagpauntat sang financial kag burial assistance sa mga Capizeño nga nagakinahanglan sang bulig bangud sa pagsugod na sang election period.

Dismayado ang isa ka ginang gikan sa banwa sang President Roxas, Capiz, matapos nagpamalibad ang Aksyon Agad Community Affairs Office sa provincial capitol nga mahatagan sang financial assistance ang mga pigado nga mga Capizeño nga nagapangayo sang bulig sa ila talatapan.

Wala ginalauman sang ginang nga temporaryo nga ginpauntat ang paghatag sang financial assistance sang gobyerno, bangud sa pagsugod na sang election period.

Suno kay Manang Marie nga kinahanglan niya ang bulig pinansiyal para sa anak nga isa ka drug surrenderer nga nagapaidalum sa karon sa rehabilitasyon sa isa ka ospital sa Pototan, Iloilo.

Nag-apelar ang ginang sa gobyerno probinsiyal sang Capiz nga ipadayon ang paghatag sang assistance sa mga nagakinahanglan kag kuntani mangin exempted lamang ang probinsiya sa nasambit nga pagsulundan bilang bulig sa mga  pigado nga kapareho niya.