ROXAS CITY – Nag-abot na sa probinsiya sang Capiz ang bangkay sang Capizeño police nga ginluthang kag ginbuno sang riding-in-tandem sa ila nga balay sa Caloocan City.

Ini ang ginkompirma mismo ni Lee Christian Castro, utod sang napatay nga si PO2 Chris Robert Castro, miyembro sang Manila Police District Tondo Police Station 1.

Suno kay Lee, ginkarga sa barko ang bangkay sang iya utod gikan sa Metro Manila via Caticlan.

Mahibaluan nga nag-angkon sang pito ka mga pilas sa likod ang nasambit nga pulis matapos ginluthang kag ginbuno sang mga suspek nga nagpakuno-kuno nga magakaon sa ila nga karinderya.

Nagalaum ang pamilya sang nasambit nga pulis sa madasig nga imbestigasyon sang mga otoridad agud mahatagan sang hustisya ang kamatayon sang ila himata.

Sa karon, nahaya ang bangkay sang nasambit nga pulis sa balay sang pamilya Castro sa Barangay Libas, Roxas City.