VIGAN CITY – Mangnamnama ni Police Lt. Col. Dexter Paredes, hepe ti Vigan City PNP, a babaen iti pannakakemmeg dagiti drug supplier nga aglive in partner a da Angelica Mora Itchon kenni Richel Parel Oco idiay Capangpangan, Vigan City idi agsapa idi March 29 ken ti runner da a ni Chandler Balangatan Paz nga agtawen iti dua pulo ket tallo, ken agnaed idiay San Julian Norte, Vigan City ket makemmeg to metten dagiti sabali pay a kakadua da iti illegal drug trade ditoy syudad ti Vigan.

Segun ken ni Paredes, dua a lawas da a sinip-siputan dagiti suspek ket idi laeng kalman, March 29, a nakaala da iti gundaway a nangiwayat iti naggiddan nga operasyon kontra kadakuada.

Mapapati nga idiay Manila iti paggap-gapuan iti suplay dagiti suspek isu a manarimaanen iti follow up investigation ken follow up operation ti Vigan City police station kadagiti impormasyon a naala da iti cellphone dagiti suspek a posible a mangitunda kadakuada iti pannakakemmeg dagiti kakadua da iti nasao a klase iti negosyo.