VIGAN CITY- Isagsaganan ti Nagbukel municipal police station iti kaso a maipila kontra ken ni Julian Dela Cruz nga agtawen iti lima pulo ket maysa, baro, mannalon ken agnaed idiay San Pablo, Narvacan ngem tubo ti San Quintin, Abra a nangbagkong ti kina-inninuman na iti maysa a natayan a ni Eugenio Bunagan Caban nga agtawen iti lima pulo ket tallo, baro, mannalon ken agnaed idiay Bantugo, Nagbukel a nakatayan na.

Segun ken ni Police Captain Gabriel Labador, hepe ti Nagbukel municipal police station,  dukduktalen da pay laeng iti motibo ti suspek nu apay a binagkong na ti biktima ta maibasar iti panagimbestigar da ket awan met iti daan a susik wennu nagsinnungbatan dagiti dua sakbay iti pasamak.

Adda pay dagiti sayangguseng a ti suspek ket adda sakit iti panagpanpanunut na ngem manarimaan pay laeng iti naun-uneg a panagsukimat dagiti otoridad iti nasao a banag.

Binagkong ti suspek iti maminsan a daras iti barukong ti biktima babaen iti patadem nga agatiddog iti sangapulo ket dua a pulgada agraman iti apputan na.