ROXAS CITY – Ginhingadlan na sang Philippine National Police sa probinsiya sang Capiz ang tatlo ka mga banwa nga ginpaidalum nila sa election hotspot area sa maabot nga May 2019 midterm election.

Kalakip diri ang banwa sang President Roxas, Cuartero kag Tapaz.

Suno kay Senior Superintendent Canelo Fuentes, provincial director sang Capiz Police Provincial Office (CPPO), ba-se sa ila monitoring nga may intense political rivalry sa banwa sang President Roxas samtang may presensiya sang mga NPA sa mga banwa sang Cuartero kag Tapaz.

Suno pa sa opisyal nga otomatiko nga ginalakip sa election hotspot area ang mga lugar nga may presensiya sang mga rebelde para matutukan ang seguridad sang mga pumuluyo.

Samtang ginpasiguro ni Fuentes nga mas pabaskugon sang mga pulis ang checkpoint operation kalakip na ang ila mayor nga kampanya batuk sa iligal nga droga kag loose firearms.

Ginganyat man sini ang mga kandidato nga indi pagkabigon nga kaaway ang ila mga kasumpong sa pultika, sa baylo, magbuligay sila para mangin katuwang ang isa kag isa sa paghatag sang progreso sa banwa.

Nag-apelar man sang kooperasyon sa publiko si Fuentes nga buligan ang mga mga pulis para mapabilin ang matinlo kag matawhay nga eleksyon.